I saladi (salami) - Per I Fradèi Signorini

Bepi ghea slevà insieme a Toni Ciodo. Quande tatini i giughea insieme, ndea ciapar pessi tel rio, ugnar ingurie (robar), dar sassade tea casa querta de zinco del Macelo (cognossido come meso chilo), ugnar panòcie de milio, scoe e mandolin ... fin saladi i ugnea. Lori ugnea nò parche zeri rugni, mà parche zeri dispetosi e fea sol par rider.

            Nonostante, Toni ghea na fama de gabolarse che tuto che lu ghenera o fea zera meio dei altri. Tea medesma stimana Bepi e Toni ghea copà due bei porsei (porchi) e ghea fato na mucia de saladi. Toni ghea fato trè stanghe grande de saladi e Bepi trè stanghe e meda. Solche le stanghe de Bepi zeri pi grande.

            Bepi savea come zera Toni e chel vegnea visitarlo e fea de tuto par catar difeti tei saladi e gabolar i sui. Cossita Bepi gà resolvesto petarghene una a Toni: a sera và tea cantina de Toni, ciapa trè saladi e porteghei casa. Tel posto gà dassà nantri trè dei sui.

            Quel´altro di a sera Toni con so fémena càpita tea casa de Bepi par far filò. Là gai magnà mandolini, bolasse, dolsi, ingùrie. Fin che i gà mossonà dei saladi. Toni gà parlà meda ora sensa fermarse dei sui saladi: che ghea restai boni, che tuti che i proea i volea crompar, che bisognea star tento ai ladri e invegiosi, chel sal e i temperi ghea restai giusti (tea medida certa), che ghea defumai dea maniera che ocorea, che la carne del porco zera la meio carne che lu ghea copà tei ultimi diese ani ... gà parlà na fila che gà dassa Bepi fin storno.

            Toni, dopo de fenir la prèdica dei saladi, gà ricordà de domandar a Bepi come ghea restai i so saladi. Bepi ghe dise: “Vuto proali e dopo dirme se i ze restai boni?” I oci de Toni gai brilià che parea un s-ciantiso parche ze stato par proali che lu ghea ndato a casa de Bepi far filò e ghe dise: “Si, si! Si che vui!” Bepi ze ndato in cantina tor i trè saladi che ghea ciapai de Toni tea note vanti. Toni e so fémena gai magnai tuti che no gai dassà gnanca na frégola al gat che spetea soto la tola coi ici tondi de voia che parea la luna piena drio s-ciarir la note scura. No gà restà gnanca le budele al poreto del gat.

            Dopo che Toni ga fenio de magnar i saladi, Bepi ghe domanda: “Gheto catà che dei me saladi?” Toni scomìssia a rosegar e mastigar el ùltimo toco dei saladi ... roseghea, morseghea ... nasea ... roseghea, morseghea ... nasea ... morseghea ... fin che gà rivà te na conclusion: “I saladi zei boni si mà ... ghe manca na s-cianta de sal, un pochetin de temperi, manco aio e la carne del porco ze  massa dura. Te gò dito par dar manco milio e trucar la marca de rassion e doperar quela che mi gò doperà. Ze boni mà se fusse venderli, cato difíssil chei assogheri i crompa. I mii si ... i mii ... giuco el col che vendo tuti tel primo posto chei ofresso e ancora i domandarà se gò depi par venderli.”  (Aotori: Ivanir Signorini e Lairton Signorini)

Manda anca ti la to storieta qua per il Sito Brasil Talian!!!