Brina, bela stesso la neve - Ademar Lizot

Ostregha!

Che fredo el inverno qua ntea provìnsia de San Piero, soratuto quando fà note, quel mondo riposa in silénsio, alora el fredo daventa piú forte, magari el fredo piú penoso e bruto ze el fredo che gavemo rento d`ànima, el fredo dea rogansa, del orgóglio.

Me piase anca el inverno, l`é un piasere scoltar la piova piampianeto sú par la querta de scàndole dea casa e de matina bonora veder la brina santìssima e bela come neve par sora el gramado, erba e piante e soraturo veder la legna brusar ntel fogolaro, in questi momenti ricordo che mei antenati í zera gente d`aria freda, dea neve maestosa. El nono e nona í ga nassesto e pasà so infansa, andove ntel inverno la neve vien co grandiosità, paeselo de Santa Giustina, provìnsia de Belluno Itália, paeselo darente dea montagneria dei Alpi, belo compagno deo paradiso. Paeselo del “massolin di fiori che vien dea montagna”, che ntea primavera ga í fiori piú bei del mondo e ntel inverno, neve bela e imponente. Dopo par compir so destin, í ga emigrà insieme dei genitori a l`América e í ga portà la so maniera, la tradission de gente d`aria freda. Così par infrontà el fredo del inverno, gavemo el pignaton de brodo a boier sú del fogon a legna, la menestra de agnolini, la polenta e fortàia e prinsipalmente el nostro vin, fato co l` ua, le man e la siensa dei nostri taliani.

Ostregha, che fredo el inverno qua ntea provínsia de San Piero, parvia che qua anca ga l`aria freda, í gaùssi lo ciama a questa ària de “vento minuano” che vien dea montagneria dei “Andi”, l`é un stravento furioso e potente. Í Gaùssi-Riograndense, gente de coraio che gà infrontà tante guere sensa spaventarse co l`é bastonade e s-ciopetade ostile, í racomanda che ntel inverno rabioso, quando fà note, par infrontà el “vento minuano” e nó patir fredo, bisogna riposar insieme imbrassiati a una femena de corpulesa. Questo ze el mèio coertor che gavemo.

Magari el mondo gira ntel spàsio sensa fine e nó se ferma mai un momento, parvia quel Signor così lo ga fato e dopo dea tempesta vien l`ària serena rento dea finestra, dopo del inverno la primavera co la fragansa dei fiori. A noantri bisogna tuti giorni cavar el capel, indenociarse zo e ringrassiar al Signor che con so sapiensa e bontà sensa fin, ga fato questo mondo, belo, maestoso, un vero tesoro par noantri.

Ademar R. Lizot