Pagine

Clique para entrar

sexta-feira, 11 de março de 2016

La seca fenice el pasto bon (El ritorno de Nanetto Pipetta (856))



Texto de Sergio Angelo Grando - Porto Alegre - RS/Foto: Derli Dutra/Pintura: Jaciano Eccher



Toni del nono Gnagno zera drio gusar el roncon, quando ghe ze capità Nanetto cola bacheta de pescar e na latina de mignoche. Co Toni lo ga visto, el ghe dise:

- Ndove veto in volta co’n caldo de questi? No se scolta gnanca le séleghe che canta. Le verde el beco come le galine par rifrescarse el corpo e ti, sensa serimònie te vè in volta cossita... Te te brusi el coro...!

- Son vegnesto torve par ndar pescar zo tel rio Sapato. El rio l’è basso e i pessi i ze muciai e ghen ciapemo on spropòsito.

- Vegnaria bolintiera, dise Toni, se no gavesse de catarghe magnar ale vache. I prà e anca i potreri no i ga più na branca de erba gnanca par far on sià. Alora me toca taiar palme de palmiro e ndar rento pal mato bruscar le piante bone de magnar, come i saltacavai. Dopo, vago fin zo tel rio catar on puchi de urtiguni par darghe ai porchi, parché anca el mìlio ze scarso. Sta seca de quaranta di ze drio rovinar la economia dei coloni.

- Ma alora mi vegno giutarve a ndar su pai palmiri e taiar le palme e dopo ndemo insieme zo tel rio. Carghemo i urtiguni e peschemo on paro de ore.

- Fato negòssio, dise Toni.

I se ga stradà co zera la par le nove, ma’l sole zera belche drio becar come na giralaca. Tuti due de màneghe longe e capelon de paia de dressa tea testa. Zera mèio passar caldo do che brusarse el coro co quel sole.

Le bèstie, cole ga visto che la careta ze partia, le se ga stradà drio. I ze rivadi darente el mato e i ga descangà i boi. Drioman, Nanetto taiava rami de piante e le bèstie catava su le fóie co’n petito mai visto vanti. Quando zera tanti rami in tera, Nanetto ga scomissià ndar su pai palmiri. Drioman che’l taiava le palme, Toni le portava tea careta. Zera el magnar che ala sera e matina drio le bèstie riceveria.

Cossita, dopo due ore, cola careta carga, i ga incangà i boi e i ze tornai a casa. Intanto ze vegnesto mesogiorno.

- Adesso, dise Toni, disnemo, femo on soneto e quando el sole se sbassa on poco, ndemo zo tel rio tor i urtiguni. Profitemo e menemo su on tambor de aqua del rio par darghe de bever ale bèstie. La fontana la ze scuasi seca.

Ale quatro i zera zo tel rio Sapato. On fileto de aqua coreva in torno i sassi. Le vaschete zera piene de limo. Tocava aver resguardo nel pestar tei sassi parché i zera lispii e zera fàssile ndar de gambe alte e rómperse la testa.

- Catemo su urtiguni, impienimo el tambor e dopo proemo pescar qualcossa.

Intanto che Nanetto taiava i urtiguni el osservava el rio. De colpo, ghe parla a Toni:

- Invesse pescar, sughemo na vasca e siapemo i pissi cole man.

Toni ga menà la testa, sensa dir gnente. Pol esser, el ga pensà, che Nanetto gavesse rason.

El zio Toni zera na persona bo-nìssima e tuti ghe voleva ben, parché tela so sapiensa, el insegnava quel che zera giusto e quel che zera sbalià.
I ga desvià el fileto de aqua de maniera chel passasse dea banda de na vasca del rio e i se ga messo col bandon a trar fora. Co se stufava uno, continoava quelaltro. I ga messo due ore vanti veder i primi pissi. Drio man che sbassava l’aqua, tele possete, capitava fora de soto i sassi sardele e zundià.

Fenio la pesca, i li ga contai. Novanta pessi, scuasi tute sardelete. Nanetto cantava e rideva:

- Vedo Toni e la Rita che bala
Dopo la sena de sardele e polenta dala
Vino e radici cola panseta...
E che vaga in mona anca la seca.
Imagem original


Redação Jornal Correio Riograndense

Nenhum comentário:

Postar um comentário

Gostou?Comente aqui e se possível inscreva-se.