I taliani ze bravi soldati - Por Ademar Lizot

terça-feira, 6 de dezembro de 2016

Ntei ani quaranta del sécolo passa, la disgràssia dea goera gà ciapà el pòpolo Talian. Un pòpolo de pace e laoro, che nó ghe piase la goera. Tutavia el goerno facista del Duce Benito Mussolini, gávea fato una combinassion, un acordo de ressìproco socorso, co`l goerno dea Germânia, che in quei tempi, l`éra in goera con í Russi e quando í se ga visto mal-ciapadi, dopo dea batàlia de Stalingrado, í gà domanda aiuto al esército Talian. Cossita, el goerno facista, par via de questo acordo, gávea la obrigassion de riméter el esèrsito Talian in aiuto ai tedeschi, alora tanti dea nostra zente gà perso la vita.

El paese dei nostri noni e bisnoni, che l`é anca el paese dea poesia, dea literatura, dea mùsica e soratuto dea cristianità, con un pòpolo de pace e laoro e anca de coraio. Nostra bela Itália, Pàtria de Dante Alighieri, Giuseppe Verdi, Gabriele D`Annunzio e Leonardo da Vinci e anca de Giuseppe Garibaldi el piú bravo de tuti, esémpio de coraio e dignità. Questa bela Itália, la se gà visto in goera, par disgràssia de tuti.
Bruti tempi ze stato quei ani de goera, la nostra faméia Lizot, anca la ga dato el so tributo de sangue e tribulassion ntea goera ntea Rùssia. Nostro cusin Giovanni Lizot. Soldà del esèrsito Talian, divisione Alpina Julia, gà perso so vita in batàlia, in onor a la Pàtria Taliana.

El gà nassesto ntel ano de 1923, ntea cità de Can de Cesiomaggiore Santa-Giustina,província de Belluno e con disdoto ani el gà partiu a far la goera ntea Rùssia, assando in drio so genitori, amici e morosa. Ntel giorno dea partensa, so pupà gà dito:- “Fá la goera con coraio e fede in Dio, el paron del mondo, che noantri pregaremo par te.”
Dopo insieme con í altri Alpini, gà disfilà e imbarca ntel tren, con so capel de stofo con la piuma negra a la sinistra, í marchea e tanti cantea par nó piànzer, in questi momenti l`é mèio cancione ze quele che parla de amore.

“La vèrginela nó posso trovarla” “solo mi basta che la sei bèla” “tchomba la riralela” “e viva `l amoré.”

Ntel mese de agosto de 1942, cento mila soldati Taliani, dele divisione Alpini, “Júlia e Tridentina”, gà imbarca e infrontà so destin al “front” Russo, nte le montagne del Càucaso, davanti el rio Don, darente la cità de Stalingrado. De questi cento mila, manco de sinquèmila gà ritorna casa in Itália ntel mese de março de 1943. Í gà percoresto in retida, depi de quatro sentinaio de km, a pié, soto neve, sensa mantimenti,sensa transporto e scarsi de armamenti, in meso í combatimenti dei Rùssi e soratuto, un fredon de trenta a quaranta gradi soto zero.

Vanti de questa retida, í ga fato la goera con coraio e sensa spaventarse dele canonade rosse. La braùra dei soldati d`Itália, el nome de questi bravi, l`é par sempre ntea stória de onorabilità dea Pátria dei nostri noni e bisnoni.

Pensandoghe sora, vardé che a ghe ga tocada própio bruta a questi bravi, esser cassai pédo che béstie, soto un fredon de crepar. Prima, menai via de la so tera, de la so casa, de lo so fámeia, de la so vita, che mal gali fato par ricever na paga de quele? Pori ànime, el Signor el saverà dargue un bel posto in paradiso, i se lo mèrita.

Quei responsàbile par questa goera, che í gà fato questo bruto laoro e anca quei responsàbile dele altre goere í ghe tocarà passar per el purgatòrio a brustolarse el òrgheno.

Adesso ntea piassa dea cità de Cesiomaggiore, Santa-Giustina Belluno Itália ghené un monumento e in questo l`é eternisa ntel bronze, el nome de nostro cusin Giovanne Lizot, insieme co´l nome dei altri bravi, che í gà combatesto ntea seconda goera mundial.

Ringrassiemo al signor e la Madona, par la pace e fraternità, parche la mèio cosa del mondo l`é volerse ben e vivere in pace.



Ademar Rocco Lizot.

Nenhum comentário:

Postar um comentário

Gostou?Comente aqui e se possível inscreva-se.

Topo