Nostra mama taliana - Por Ademar Lizot

segunda-feira, 23 de janeiro de 2017

Quando zera picoleto, ancora taca su le braghe de mio pupà, lu me gà dito:...”Bisogna che te sépie che la vita `l piena de tribulassion e dificultà e soratuto la ze na granda lission de umiltà. Ma nó ste mai smentegarte che un omo, el mondo nó lo mena via, quando el gà fede in Dio e la fortuna de èsser insieme da na sposa de amabilità e coraio.” Quele parole le go capi dopo de ani passà, quando zera piú grando, alora go intendesto che quela dona de amabilità e coraio, che lu parlea zera la nostra mama Luiza, persona de cuor valente, laoro e simplissità, la aotentica “mama taliana”, che salta su de matina bonora, co´l osamento del gal, par far tuti í laori dea casa e dopo andar ntea colônia, ribaltar mato, sapar, piantar, parche nó ghe manche niente rento casa. Santantoni zera el so santo e quando la preghea í síqueri, fin la tempesta se s-ciarea. La gà nassesto ntel giorno 25 de genaro de 1918. Cossi par mi tuti ani in questo di, go el cour pien de sentimenti e con í ricordi d`anima, scrivo un pochetin de come zera so vita.

In quelo ano de 1918, la pace gávea ritornà al mondo, finia la guera mondial, magari ntea colônia del Rio Grande, nostri noni gávea so guera tuti giorni, guera de laoro e tribulassion. Nostra mama, con nove ani, gà scomìsia laorar ntea rossa dea matina fin el scurir. Dopo quando retornea casa, la aiutea so madre darghe de magnar a le béstie, tor aqua e legna e vanti butarse zo, spassar e lavar í pianti. Con undese ani, la savea far pan e anca í bígoli. Ricordo che la parlea che la gà mai studià, parche so pupà gávea visto che í so brassi í zera depi importante ntea colônia che so testa in Scola.

Cosi gà transcóresto so infansa e la gà cressesto. Quando la gávea disdoto ani, nte na domènega de festa in onor a la Madona de Caravággio, la gà conóssesto un toso, colono, el gávea nome Antonio, in onor a Santantoni, má tuti lo ciamea de Toni. Così in quela domènega, con la benedission dea Madona de Caravággio, í se gà volesto ben ancora col primo vardar.

Ín quei ani el rispeto e la religiosità comandea tuto e bisognea el permeso, la benedission dei genitori par scomissiar a morosar. La prima cosa che el pupà de na tosa vardea, zera le man del moroso, par veder se el zera laorador. Toni Lizot zera un tosato co le man piene de calosità e anca omo de forsa ntei brassi. Cosi dopo dea benedission dei genitori e dea Madona, í gà scomissià a morosar. Alora, “Le note bele de luna piena, gà s-ciara quel belo morosar.”

Ntel ano de 1936, í se gà maridá e dopo í ze ndai de star ntea casa dei noni Umberto e Carolina, che la gà ricévesto compagno de na fiola e presto la se gà costuma a volerghe ben a tuti, stesso de fradei. Ín quela casa granda, co´l vignal e el giardino pien de Fiori, ntel giorno 21 de giùgno de 1937, gà nassesto el primo bambin, nostro fradel Ventura. La mama sempre parlea che quelo giorno, zera fredo che mai, gávea brina sora el gramado, erba e piante, brina anca sora í guèrti de scàndole, na brina santíssima e bela stesso neve.

Due ani dopo í gà andato via a le tere nove, ntel stato de Santa Catarina, paese lontan e de fadigosa rivada. Ntel giorno dea partensa, la emossion se fea sentir:...dei fradei í gà guadagna un abrasso e dei noni, la benedission par el grando viaio. El nono Umberto ghe gà dato í soldi par la achisission de un tochetin de tera. Dea nona Carolina, í gà guadagnà una pignata de fero, par far la polenta, la nona gávea trèdese fioi e savea che par noantri taliani se gavemo polenta, radicci e qualche altra mestureta, nó bisogna piú niente. Dopo el nono ghe gà dito:..-“Nó ste mai perder la fede, la speransa e la religiosità, soratuto crede in Dio el paron del mondo e mai smentegarse che la amicìssia, el volerse ben, el giutarse de na persona con l`altra, ze la cosa piú importante dea vita”. La nona co í óci pieni de làcrima, gà dito:..-“ Ghe ricomando de tuti giorni dir su el Síqueri de Santantoni, che noantri anca pregaremo par voi.” Maginarse el dolor rento d`anima dei noni, veder so nipotin, che gà nassesto rento dea so casa e chel zera sempre insieme a lori e adesso ndea via a un paese lontan.

Nte le tere nove de Santa Catarina, ntei primi mesi, í se gá visto rento deo rancheto in meso al mato, sensa el orto, sensa galine, sensa vache, scarsi de soldi e laori de far, mato par ribaltar e laorar stesso de na béstia. Ntel secondo ano, par disgràssia, gà dato na infermità in nostro pupà, nól podea nianca caminar, cosi gà toca a la mama far tuto...í laori dea casa, giustar, lavar le robe, far de magnar e dopo ndar ntea colônia sapar e piantar. La menea insieme el pícolo, lo metea soto na ombria da na pianta e lu povereto stea la fermo, vardando la mama laorar. Dopo de due ani che í zera la í gávea belche galine, porchi, due o tre vache e el paiol pien de mílio, L`era el ano de 1942 e in questo ano gà nassesto nantro bambin, na toseta, nostra sorela Lourdes. Tutavia quando la vita scominsea ndar polito, e nostra sorela gávea fato due ani, par desgrássia ghe gà dato na malatia ntei palmoni e quel paeselo che í zera de star, l`era lontan de tuto, in meso al mato, sensa ricorso. Í gà fato quaranta km a caval con la bambina in brassio par rivar a la cita piú darente inserca del dotor dea medissina. Magari vanti rivar ntel dotor la toseta ze morta

Dopo de questa disgràssia, í gà ritorna al Rio Grande, insieme ai parenti, presto í gà vendesto la colônia, í mantimenti e la scarsa mobília. Nostro fradel Ventura se anca picoleto, el gávea sìnque ani, nól se gà mai smentegà del giorno dea partensa, quando el gà visto na bruta machina, che molea fumane, zera el trem, “Maria Fumaça”, zera próprio robe de spaventarse. Quando í gà oltrapassà la frontiera, ntel fiume Uruguai, í gà fato na preguiera, par ringrassiar el ritorno a quelo paese benedeto che ani vanti gà ricévesto nostra zente rento de so cour. Ntea scarsela í gávea í soldi par comprarse tera e casa, adesso darente ai noni, la par sora í monti andove í gà nassesto. Due ani dopo, mese de maio de 1945, gà nassesto nostra sorela Leonilda.

Nostra mama taliana, l`era seguressa dea nostra fámeia e fortalessa de nostro pupà. La so vita zera la fámeia e el laoro, nó ndea a spasso, divertirse, magari la zera anca felice. La gávea l`é tre piú bele virtú deo cristian:..”la fede, la speransa e la carità, la fede in Dio e so bontà, la speransa de un mondo méio e la carità, la Regina de tute le virtù.


Por: Ademar Rocco Lizot.

Nenhum comentário:

Postar um comentário

Gostou?Comente aqui e se possível inscreva-se.

Topo