Pagine

Clique para entrar

quarta-feira, 1 de março de 2017

Nostra Sbelegata - Por Ademar Lizot

Le bestiolete le ze creature dal Signor. Cossi sempre parlea el pupà e la mama e anca par me le ze creature Divine che nó le fà mal a nissuni. Altro giorno gavemo guadagnà na gatina e bisogna dir a tuti che la ze belíssima, la gà el pel briliante co`l ventre e le gambete bianche stesso neve e dopo í óci í ze tanto bei che nó go mea l`abilità par descrìver el color. Ntel primo giorno quà casa, dopo che í la ga cavada via de so maré, la gà piandesto, magari dopo de una scudela de late e nostra amabilità, la se gà serenà. La gavemo guadagnà del nostro vizin. Mi la ciamo “sbelegata”, e mia sposa la ciama “mimeta”. Questa gatina la gà na granda amabilità e dolcessa co noantri. Magari la fà anca dispeti, spaca vazi de fiori caríssimi in mila tochi, alora bisognaria dirghe sú e anca darghe na sberleta, ma noantri sempre la perdonemo, parvia che la ze ancora pícola. La magna sol rasson, mi volaria darghe anca na feta de polenta e formaio, má ze méio che nó, parvia che la polenta la ze tanto piú delìssiosa e dopo nó la magna pi la rasson. La ze na bestioleta de caprìssio, parche la fà í so bisogni tuti rento nte so casseta de arena. Ín questo mistier, í gati nó i ze mea stesso í can, che í fà í so bisogni par tuti cantoni e dopo spussa che fà squifo.

Adesso che nostre fiole le gà andato via de casa par compir so destin, questa gatina l`é nostra compagnia de tuti di. Ancoi í costumi í gà cambia, cossi í gati o í can í ga anca questo doperamento. Ani vanti quando se stea ntea colònia í gati gávea el so afaro che l`era magnar ratin e qualche feta de polenta o un tocheto de formaio vansà e nó se stea la lecarli. Ricordo che la nona parlea che se te scominsii a lecarli, í deventa dispetosi e pieni de confiansa, che dopo par farghe la vita, ze brute robe, tutavia, bisogna rispetarli, parche í ze bestiolete fate dal Signor e salvae del dilùvio par Noè.

Trè mesi fà che che questa bestioleta ze rivada in nostra casa, cossi la se ga abituà co noantri, parche la ze furba che mai e sempre drio vardar í nostri gesti. De matina bonora la ze própio na prosieta, parche tuti í giorni la vien in nostro leto e scomìnsia a far dispeti, fin che levemo sú e la ciapemo ntei brassi. Quando volemo assìstere la television, la se pianta davanti e nó semo boni de pararla via, la fà í óci de cativa, par fin che la vol dir che quei la rento a television í ze tuti mati, i te fà veder quel che í vol lori, í ciapà na mosca e i te fà creder che l`é una colomba, nó l`é mea verità? Bisogna veder la contentessa de questa gatina, quando me dona scomìnsia a laorar ntel giardino di fiori, a ribaltar tera e darghe àqua ai Fiori, alora la “sbelegata” la va insieme e la fà gesti, se tra zo de na banda, dopo d`altra, la se buta zó co le gambete in sú de contentessa. La fà própio de rider. L`é anca un pecà che quà casa nó ghe ze qualchedun ratin par ciapar, alora si, salvete mondo e deliberete tera.

Quando se riva casa, vanti scurir, l`é na emossion de veder la contentessa che ghe salta dosso e í gesti de dolcessa e suavità, che la fà par noantri. Ín questi momenti go la comprovassion che l`anima de le bestiolete la ze bela, límpida, pura e anca un esèmpio de amabilità par noantri cristiani dal Signor. Pensandoghe sora, se noantri cristiani, gavese questa amabilità e dolcessa, se poderia viver tanto ben al mondo e se cataria piú gusto de vivere.

Ademar R. lizot

Nenhum comentário:

Postar um comentário

Gostou?Comente aqui e se possível inscreva-se.