La Casa Bianca - Per Ademar Lizot

Í ricordi e sentimenti del paeselo che go nassesto í ze par sempre rento de mio cour. La cità de Arvorezinha, la par sora í monti, quà ntea Provìnsia de San Piero, in quela cità ga ancora la casa bianca dei primi ani dea mia infansa. Ntel ano de 1950 me genitori la ga alsada sú, bela e maestosa, co´l sudor de so laoro, in quel ano i ze vignisti via dea colònia, par resider ntea cità. Sentimenti de speransa e fede í gavea rento del cour, parvia quel mondo zera in pace, cìnque ani vanti ga sussedesto el fin dea guera mondial, e le persone gavea rento d`ànima generosità e amabilità e anca el goerno brasilian, dopo quei fioi dei migranti Taliani í ga fato la guera insieme dea trupa brasiliana e i ga infrontà le canonade ostile, sensa spaventarse e anca tanti í ga perso la vita par la Pàtria brasiliana, dopo de questa testimoniansa de onore e sàngue, el goerno brasilian se ga scusà per la stupidità de impedire che se parlasse el nostro idioma materno. Così dopo dea guera ga scominsià e transcoresto ani de pace e speransa. L`era un tempo che la generosità e la simplissità zera tanto più forte che la rogansa e la impàfia.

Ntel mese de otobre de 1957, go vignisto al mondo e ntel momento dea mia nàssita, mia madre gavea 40 ani de eta e così la ga squasi perso la vita par la mia, tutavia dopo la ga vivesto ancora 45 ani co la gràssia del Signor. Ricordo che sempre la mama disea:...-“ El mondo gira ntel spasso sensa fin e no se ferma mai un momento.” Così el tempo se fa avanti par tuti e anca mi so avanti co l` stassion e co la scàtola dei ricordi piena, alora quando ritorno qualche olta al paeselo che go nassesto bisogno veder la casa dea mia infansa, adesso vècia e sbandonata dopo de 67 ani. Quando arivo davanti dele so finestre, sempre me vien dolsi ricordi, alora cavo via el capel in rispeto a so stòria e ricordo dei ani vanti, quando la zera bela e maestosa, sempre co le finestre verte par vegner rento n`aria serena dopo dea tempesta. Ricordo dea so cosina col fogon a legna, co le pignate piene drio bóier, alora la ringràssio perchè rento dei so còmodi, i mei genitori i ga vivesto í meio ani dea so vita. In quel s -ciantin me vien ntel cuor n`aria de contantessa e co l`testa piena de ricordi, mio cuor sbate forte e ritorno ntel tempo de quando zera picoleto e me par da veder ntea finestra, el pupà co`l so capeleto in testa insieme dea mama, i due felice parvia che i ga vivesto nte na època de simplissità e aotentissità compagno de na feta de polenta e formaio co un bicier de vin. Tempi che se vivia con più gusto e la vita zera bela stesso de un massolin di fiori.

Ntel momento dea partensa, la saludo come se la fusse na nona taliana, co´l so fassoleto in testa, cavei bianchi e soratuto co so ànima de coràio e dignità.

Ademar R. lizot.