Pagine

Clique para entrar

domingo, 9 de julho de 2017

Í omeni í ze compagno el vin, la età fà mèio í boni

Darente a la cità de Marau, qua ntea Provìnsia de San Piero, ghe ze un paeselo belo che mai, con piantaion de mìlio, formento e anca vignai, í ghe ciama “Gramadinho”. Questo ze el paeselo del nono Fiorindo Dalberto, cristian esémpio de simplissità e aotentissità, de orìgene Véneta compagno de noantri, novanta ani so eta, novanta ani de laoro, onestità e simplissità.

Go mai smentegà la prima olta che lo go visto, co so capel alsa sú in testa, i mostaci longhi de rispeto i onore e i òci de serenità e sapiensa. Alora lo go saluda co emossion ntel cour, parvia che zera davanti de novanta ani de simplissità e onestità, zera davanti de un omo del tempo dea amicìssia, del volerse ben, de giutarse de na persona co l`altra. Dopo go scoltà co gusto parole giuste, parole de na persona de ànima límpida e pura, parole de serenità e umiltà. El me ga dito che la belessa d`anima ze la carità e che la vita ze bela e bisogna tuti di ringrassiar al Signor par so bontà sensa fin e quel méio ogetivo dea vita deo cristian ze la famèia e el laoro. Insieme dea sposa el ga alsa sú quatòrdese fioi, persone d`anima granda e caráter pien de bontà. Ín quel s-ciantin che scoltea el so discòrer de sapiensa e simplissità, me ga vignesto in testa quel nono Fiorindo l`é na persona benedeta del Signor e paron de un grando tesoro, so fámeia e la stória dea so vita. Dopo semo andati a so casa, bela e imponente, co`l vignal e soto casa la cantina co le bote piene de vin.

In cantina gavemo bevesto un bicier de vin co la fragansa dea ua. Alora el me ga parla un pochetin dea so vita, de laoro in colônia, dea matina bonora fin el scurir, ribaltar mato, sapar e piantar, un laoro benedeto compagno de na preguiera. Sempre con credensa in Dioi e speransa el ga infrontà l`é tribolassion dea vita. Al stesso tempo che scoltea quele parole de sapiensa e serenità, me vignea in mente quel nono Fiorindo l`é un omo benedeto del Signor e anca el ga na granda richessa, un vero tesoro che ze la so faméia, so stória de vita.

Ntel momento dea partensa, go cava el capel in rispeto e lo go saluda e ringràssia par so esémpio de vita. Quando ritornea casa, l`era note, el cielo Stelà e co n`aria de serenità in ànima, go scominsia a pensargue sora quel mondo adesso l`é ribaltà a gambe in sú, parvia dea scarsità de persone compagno del nono Fiorindo, scarsità de onestità, simplissità e pace, le persone par che le gà perso la tramontana, sarà che no manca un poco de simplisità, serenità? Um poco de Dio ntea nostra vita?



Ademar R. Lizot

Nenhum comentário:

Postar um comentário

Gostou?Comente aqui e se possível inscreva-se.