Pagine

Clique para entrar

RÁDIO AMICI DEL TALIAN NO AR

quinta-feira, 14 de março de 2019

Furbessa del Caval Tubiano - Roberto Arroque

In tei so squasi cento ani de vita, la nona Adelina Montanari la ghen’à visto tante e de
tute le sorte.
“--Ma questa la ghe gà sucedesta pròpio a me fradel pi vècio, Luizìn Vignati, vostro
zio!”
– La ghe contava ela ai so fioi e, dopo, ai so neti.
– El zio Luizìn,”
La ndava avanti con la stòria la Adelina
– El zera de star a Santa Teresa, andove una volta stàvino anca noantri, al tempo che'l posto el zera ancora un distrito de Bento.
Quando che'l ze vegnesto vècio, invesse de ciapar la corona Luizin el gà ciapà el
gusto de bever un tragheto!
- Ben, ‘bever un tragheto’ la ze una maniera de dir-lo par rispeto. In verità lu el ghen
beveva arcoanti tragheti drio man...
“Luizìn el gaveva un caval tubiano, gran inteligente! El ‘Tubiano’ romai el zera
vècio anca lu e, co'l tempo, el gaveva imparà a recognòsser Quando che so paron el zera
meso ciucheto. O sinò anca ciùco del tuto... Par che lora i zera momenti andove chel ato de
montar a caval el se tornava una speriènsia dolorosa par tuti due, la montaria e el cavalero.
Tòmbole, rabaltoni e spelade!
“Arquante volte i ze ndati in rìs-cio de sucedèrghe una tragèdia, o almanco del zio
Luizìn deventar desgrassià...
“Fin che un giorno, come che'l zio nol zera mia bon de tomar una providènsia, el
caval el gà resolvesto tomarla lu! E de là avanti el Tubiano el gà scomissià refudar de
assarse montar tute le volte che'l vècio el vegneva fora de la bodega ciuco. Par più che'l
proasse, el caval no lo assava mia.
“El Tubiano el ndava avanti caminando de passo, Luizìn rabioso vegnéndoghe
drio e proando saltar su, e la bèstia la seghiva tranquila la so strada, sempre s-chivandose
de le proade de imbarcar de quel'altro.
. “Fin che, pi avanti, i rivava nte un barancheto che'l podeva esser doperà tipo un
scalin par montar. Là si! El caval el se tirava ben darente sto baranco e lora me fradel el ghe
saltava ntela sela sensa tante dificultà.
“Co'l tempo Luizìn el se gà costumà anca lu a taser e a compagnar el Tubiano fin el
scalin del baranco, andove che'l montava con un salto s-cèto tirando un poche de volte
che'l ghe passava via del caval e el cascava de quel’altra banda...
“Fin che se gà tornala cosa pi natural del mondo quei dela bodega star là a vardar
el vècio che'l se partiva caminando pimpian drio al caval e, sensa barufar con gnente,
el spetava rivar ntel posto de sempre par imbarcar là andove che romai ghe zera el
baranco tuto liso e spelà dei sbrissioni che ancora tante volte i sucedeva ntela prima
proada de montar.
“Ma el Tubiano, furbo, nol ghe gà mia insegnà ai altri cavai la so tècnica de
sparagnar i rabaltoni dele ciuche dei so paroni.
“Arcoante volte, quando che i amici del zio Luizìn i rivava rento la bodega co'l
naso gratà o sinò mancandoghe qualche toco de coro par via de una tòmbola de caval, lori
sùito i ghe dizeva:
“- È... te vè ben, ti, Luizìn, che te ghè cqel furbo de quel Tubiano. El me caval, se
ze par lu, el me assa ciapar rabaltoni de scavessarme tuti i ossi. E dopo, ancora, el gà
coràio de sgrignar par riderme drio...”

Nenhum comentário:

Postar um comentário

Gostou?Comente aqui e se possível inscreva-se.

txt

google.com, pub-2838464224155337, DIRECT, f08c47fec0942fa0