El Primo Petshop de Serafina - Roberto Arroque

Talian-Língua de imigrazzione italiana in Brasile

La barbearia Modelo, andove che laorava so zio
Clodoveo, l’era el ponto che Clodinei Grandi più ghe
piaseva star quando che'l ndava via banda la piassa. El
catava belìssimo quel ritual che scomissiava con una bela
spiùma ntela fàcia del cliente sentà fermà e de òcii
seradi. Dopo vegneva la rasura ben afilada passando lisa
sensa mai taiar la pel. E, a la fin de tudo –questa la zera la
meio ora—, la lossion par dopo barba passada in
abundànsia par sora de la barba pena fata e scorendo fin
zo pal col, profumando tuta la barbearia.
Un sogno de Clodinei el zera ver anca lu un fiasco de
lossion de quela là par spandersela volentiera su pal
muso e ndar via perfumà come che i ndea via in freghesi
del zio Clodoveo. Mas ze stato che un giorno el zio el
ghe dà un viero ben grando de lossion de presente. Lora,
dopo, tuti i giorni, quando che Codinei el ndea via in
piassa, prima el se passava sta lossion rifrescante e
perfumada. El se fermava un poco in te la barbearia
Modelo par che el zio el se inacorzesse come che lu el
prestigiava el so presente. E quando che Clodinei el gà
tacà desmentegarse de méterse su sto perfume, so
sorele le lo fea passarselo, sinò disarìsselo chè el zio sel
se inacorzesse che'l gaveva abandonà el regalo che lu
tanto volentiera el ghe gaveva dato!
Ma infati, Clodienei el se gà stufà de la so lossion. E el
se sgionfea ogni giorno de più de quel odor gran perfumà.
Ma lu ghe tocava stesso méterlo su. Dele volte el se
partiva sgoelto parché le so sorele no le fesse mia ora
inacòrzerse. Ma eco che lore sempre le ghe vegneva
drio col fiasco in man par spànderghelo su par la fàcia.
Ghe ze rivà una ora che lu no'l podeva gnanca più véderlo,
ma el viero el zera ancora pi de metà pien. Tocava catarghe
 una solussion urgente par quel problema. E un giorno
pena dopo mesdì, un caldo de morir, la solussion la ze
capitada.

“— Clodinei, và darghe bagno a Quel can li, che romai
nissuni pi pol starghe darente de la spussa!” . La ghe gà
dito so mare segnandoghe in diression al Bilu, un can negro che'l
zera sempre drio catar i peso posti par ndar sgratarse.
No gà gnanca ocoresto che la mama la ghe lo disesse
nantra volta. Clodinei el gà ciapà el Bilu de sorpresa, lo gà
ligà, e el ze ndato tor el material che'l doperaria pal
bagno: la lossion del zio Clodoveo. E solche! Gnanca àqua
no ocorarìa mia...
— Ancoi no te ndarè mia via con odor
de saon vècio, nò...” . El ghe gà dito al Bilu. “
— Quando che te molo te sarè el can più profumà de tuta Serafina Correia...”.
Lora Clodinei el ghe gà voltà zo el viero intiero de la lossion.
El gà imbobà el pel del can de profumo, de la testa fin la coa.
E quando che lo gà molà, seguro che'l Bilu el zera
del bon el can più perfumoso de Serafina parché se ghe
sentiva el odor anca stando banda de là de la rua.
Dopo de sto ato che'l gà ciamà de ‘bagno’, Clodinei el
se gà desmentegà del can par un per de ore, fin quando
che'l ze rivà a casa par magnar la merenda. Lora, el gà
catà una revolussion: so sorele cative proando parar via
el Bilu, che, mato de fame, el teimava vegner darente casa.
Lore le lo ciamava de ‘can spusson’, e le se gà inrabiade
col Clodinei che'l gaveva impromesso de darghe bagno e
lo gaveva assà in quele imundìssie là. Ma come? E la
lossion perfumada, serà che no la gà mia fato afeto?
Par quela si. Ma gà sucedesto che'l Bilu, quando che'l
se gà sentisto con tuto quel profumo dosso, che lu nol ghe
gà mia piasesto gnanca una s-cianta, el se gà mola de tuta
carera, profumando fin distante par tuto andove che'l
passava. E un poche de ore dopo el ze tornà a casa co'l
profumo che'l se gaveva seliesto lu: quel del porsil de
Vitòrio Lovisa! El zera ndato soto el porsil rolarse su
pa'l strume fin che'l se gà sentisto seguro che tuta la
lossion la se gaveva svampida. Lora, co'l so novìssimo
profumo merda de porco, el zera el can pi contento
de tuta Serafina.

Tornà a darghe bagno, adesso si con àqua e gran
tanto saon. Ma lora Clodinei ghe ze vegnesto in mente de
dirghe a so mare che par tirarghe via quela bruta spussa
del Bilu tocaria doperar la lossion del zio Clodoveo. So
mare, che no la gaveva mia savesto che la zera stata
doperada prima e che no ghe zera più gnanca una gossa
de sto perfume, la ghe gà dito de metérghene zo gran
tanto.
“--El viero intiero me gà tocà meterghe su par
neutralisarghe tuta quela merda de porco là!” dopo el
ghe gà despiegà el Clodinei. El Bilu, magari pena fenìo el
bagno, el se la gà tolta nantra volta. “
— Quà i vol coparme!”
El se gavarà pensa el can. E i lo gà visto sol al giorno
drio. Ma lora, già che nissuni più gà bio voia de meterghe
el naso in sima el Bilu par veder che odor chel gaveva, tuti
i gà fenio la stòria contenti: so mare e so sorele del
Clodinei parché finalmente el can nol spussava più,
almanco de distante. El can parché no'l gaveva pi su quel
profumo che squasi lo gaveva fato deventar mato. E el
Clodinei parché el gaveva catà una maniera segura de
vederse lìbero dela lossion. E, par quel che se sà, fin el
zio Clodoveo el ze restà contento de no ver più de snasar
so nevodo con quel profumo metà lossion e metà sudor de
dopo el giùgo de bola che'l gaveva Clodinei quando che'l
capitava corendo dentro de la barbearia Modelo par
saludar so zio...