El Tesoro del sparagnon - Ademar Lizot

domingo, 12 de janeiro de 2020

Ascolta la stòria ntel voce del scritor:




                             El Tesoro del Sparagnon
 
Chi sparagna la gata magna, conto adesso come che se ga fini el tesoro d`un sparagnon
         Ntei ani cinquanta del sècolo passà,  nel interior dela cità de Soledade,  gavea un contadin  paron d`una stragranda fortuna, con fama de sparagnon, el gavea   avarìssia nte i schei e avarìssia nte i sentimenti, co la  richessa d`un nobre el vivea compagno d`un porocan.  La fortuna de soldi e monede d`oro el gaveva  rento d`un baù che dopo lo ga sconto con secretessa, a lontan dela so casa,  e el  mapa dela localisassion, lo gavea postà dadrio d`un spècio, fra i altri due quel gavea rento dela casa e questo segreto no`l ga mea revelà par nissuni, però el   portea sempre rento del portafoio de coro, un bilieto che contea el posto ndove zera sconto el mapa, l`éra una indovinela,  mèio dir un enigma, cossì scrito: -“Se par desgrassià me toca de sparir de questo mondo, el mapa del splendor che incantà e che fà i omeni vegner fora dei sentimenti, lo go sconto dadrio del riflesso che par tanti ani ga sguarda el mio viso.”
      Fin che nte`un giorno, quando el gavea cinquanta cinque passa ani de eta, el ga buo un ataco fulminante e repentinamente el ga spari de questo mondo. In quel giorno,  insieme dele robe del morto, la serva dela casa la ga incontrà el portefolio, co na sbranca de soldi e quel bilieto e come nò la savea leder,  lo  ga sconto insieme dei soldi,  de soto del paion. I cinque fioi del vècio, due tosi e trè tose, i ga rabaltà tuto rento dela casa in cerca del tesoro, quei savea quel gavea sconto, però nò i ga mea incontra gnente.   Ntela divission dela eredità, dopo de una granda barufa, la mobìlia dela casa i ga destinà a Amàbile, la fiola pi vècia, che par far soldi, presto la ga risolvesto vender  la mobìlia pi antiga a una casa de negossio  ntela cità de Soledade e insieme ga ndato i trè spècie.  
       La serva dopo de una stimana la ga ndato a la cità par comprar  scarpe, robe nove e recini d`oro e cossì con robe de festa, presto  la catà anca un moroso, un toso dela cità, pien de pròsia.  Amàbile la ga sospeta dele robe nove dela serva e la ga domandà ndove che ga vignesto i soldi, parvia che la savea che la guadagnea na bagatela par mese, alora la serva ga confessà tranquilamente la so colpa, però Amàbile la ga perdonà, parvia dei ani de laoro che la gavea ntela casa. Dopo la ga domandà...
    -El portafoio ndove quel ze?
    -Lo go guarda de ricordo e rento ghe nè solamente un bilieto! Ga rispondesto la serva.
   
Quando Amàbile ga lesto el bilieto, la ga spalancà i òcii de spavento, co la relassion sora la risserca dela fortuna sconta. Ntel medèsimo giorno la ga ritorna a la casa de negòssio par comprar  i trè spècii.  Quei pi grandi la ga incontra  e quel picinin del bagno i gavea vendesto a un contadin, nel interior dela Fighera Alta. Alora co`l permesso del paron la ga retira la protession dadrio dei spècii, però nò gavea mea gnente, alora la ga capi che el spècio che par tanti ani gavea sguarda el viso del so pupà, l`éra quel picinin del bagno e  co´l  indirisso in man la ga ndato in cerca e dopo de una negossiassion lo ga compra par el dòpio del valor, però de sùbito la ga visto quei gavea retira la protession dadrio e furta la carta del mapa.
     Dopo de tanto despiaser par gnente, la ga ritorna casa e de sùbito la ga domandà a la serva se qualchedun gavea lesto quel bilieto.   La serva piena de spavento  ga afirmà quel so moroso, quel toso pien de pròsia, el gavea lesto e dito che zera el indirissio de una dona, amante del morto e de sta manera el  ga domandà par nò dir gnente a la fameia, in rispeto al vècio e dopo de quel giorno  nò lo ga pi visto.   Alora Amábile  la se ga desmissià e la ga capi che quel fiol  de´n can, moroso dela serva, el  gavea furtà el mapa del tesoro e dato na ciavada a tutiquanti.
      Dopo de sei passa mesi i ga savesto che un toso pien de pròsia dela cità de Soledade gavea comprà una stragrande propietà rural con de pi de mila boini. 
Ademar lizot.

Nenhum comentário:

Postar um comentário

Gostou?Comente aqui e se possível inscreva-se.

Topo