Una stòria de sti ani - Ademar Lizot

sexta-feira, 8 de maio de 2020

Ascoltemo questa bela stòria:


                                        
 Sti Ani Indrio

   Nono, vu che save contar stòrie come nissun  altro, conteme una de sti ani indrio.
  -  De Sti ani?  Si go arquanti ricordi de sti ani, parvia che comular bei ricordi, pol èsser la mèio cosa che se pol far ntela vita, alora  posso dir che sti ani,  abasso del querto de scàndole dele case, abitea gente co una semplicità amiràbile,  i se ciamea... Bepy,  Vitòrio, Toni, Amadeo, Biaggio, Joanin,  Balduino e le tose se ciamea... Gema, Dosolina, Francesca, Gasperina, Ortenila, Pierina, Domenica,  Agostina, nomi paroni de bela sonorità,  che gavea gusto de pronunciar e sèmplice  compagno dele case, alsade su  de taule de pin co una aparensa  ùmile, pèro nte la so  umiltà se podea veder la maestà de un vero palasseto, co la cantina piena de bote de vin, el poss co la aqua bona, pròpio fresca,  co`l vignal del nono de na banda e el giardin dela nona de quelaltra e in torno, sempre in giro un bacan de galine, porchi, cagni e gati e, la tranquilità de quele bestiolete portea serenità a l`anima dele persone e de sta manera la vita la zera pi calma rento de quele case che a le volte se piandea, ma pi de tuto se ridea, parchè  se vivea in completa fradelansa e con speransa nel cuor.
   -Sti ani,  quando Bepy, o  Vitòrio o furse el  Toni, el Biaggio o el Joanin i completea quindese ani de eta, el nono ghe disea:...”Adesso te pol bever vin rosso che el te fà vegner sàngue ntele vene e, quando i fea disdoto ani, alora el pupà ghe disea:..Bisogna che te sèpie che un omo el mondo nò lo mena via quando el ga fede in Dio e una dona amàbile e sinsiera, e quando la  Dosolina o la Francesca, o furse la Gasperina, la Domenica e l`Agostina, completea quindese ani, la nona ghe disea...”-Bisogna che te sèpie che i omeni i ze postadi andove se finisse la tera e le done andove scominsia el cielo”, e  ai disdoto ani  la mama ghe disea...”Adesso te pol maridar, te se cosir le robe,       far candele de sebo, tassade de marmelade      e  delissiosi pan e gròstoli ornati col sulchero briliante.
“-Nono, ma che bei ricordi, de quel tempo in che le case   gavea la maestà de un palasseto e le persone la gradessa dela generossità!  Ma caro nonino, adesso me piaseria de saver  come che zera sti ani nte la  domènega.”
  - Sti ani  nte la domènega se  andea contenti a la santa mesa, quando se scoltea sonar le campane dela ciesa,   se fea svèlti, par netarse e meterse su le  mèio robe  , i tosi  co la fatiota e el fassoleto nte la scarsèla e le tose co`l vèo nte la testa,  e co`l ombrelin in man  e rento dela ciesa ,  sentea  i òmini de na banda e le done de nantra, alora el prete disea la mesa in latin, “Agnus Dei”, e nel pùlpito el fea la prèdica, longa che parea che la no se finia mai pi,  i tosi i se stordea el col par sguardar  in torno, par veder se sta benedeta mesa la se finia, par andar fora ciacolar qualche parola co le tose e cossì rangiarse la morosa e i òmeni maridadi anca lori no i vedea l`ora de finir de pregar par andar fora bever un bicier de vin e giugar le carte, el trissete o la brìscola e le done gavea prèssia par tornar casa par far el disnar,  solche le veciote le volea tiràrsela sempre pi longa, parea che le volesse ndar ntel paradiso prima de morir.  
 
   - Nono e  le done come che le zera sti ani?
  -Sti ani le done le zera parone d`una benedeta inossènsia e le gaveva  na manera sèmplice de farse remirar,  se gavea pi gusto de darghe fiori, de parlarghe con rispeto   e quando se catea una pròpio del nostro gusto, una che iluminea nostra ànima  come se la fusse el s-ciaro dela stela d`alba, alora se restea talmente remirà co la so belessa, so profumo e la se desìderea  ardentemente, però par scominsiar a morosar solche dopo del permesso dei so genitori.
 -Caro nipotin, cossì che zera sti,  in quel tempo in che un omo sensa dona, el zera compagno d`un pess fora del rieto, un  tempo che ga viaia nte le ale del vent, però la m`anima la ze par sempre guardian dela quela stòria e de quele  vècii case, che con so parede  ancora suporta i vècii ritrati dela nona con so òcii de teneressa e del nono co so mostàcii che i zera una marca de rispeto.  Ma adesso basta de stòrie, assemo par contar nantra volta, parchè de tanto parlar me fa mal la gola e bisogno darghe na moiadeta,   na sboconada de vin, và ben cossita?
-Brau, brau, nonino e mila gràssie par racontar  bele stòrie de sti ani quando la vita zera pi sèmplice e sensa lusso.
Ademar Lizot.
  

Nenhum comentário:

Postar um comentário

Gostou?Comente aqui e se possível inscreva-se.

Topo