Pagine

Clique no Player abaixo para parar a Rádio / Struca par fermar la ràdio

Clique para informações / Struca par informasion

segunda-feira, 25 de janeiro de 2021

Ricordi dela Colonia - Ademar Lizot

Ascolta el àudio strrucando soto:


 

 

                                    


      Ricordi de la colonia

   Bona sera compare  Santin e, vien rento bever un bicier de vin. Serimònie nò sta mia de far e gnanca  i stivai cavar. Questa l´é na casa  sensa lusso, de`n contadin-gausso e, intanto che bevemo, sora sti ani indrio ricordemo.

   Gràssie compare, l`é própio na alegria ricordar de quei ani quel vent ga portà via, de quando tochea netarse ntela aqua del rieto e, se fea el bagno solche na volta a la stimana, squasi sempre al sabo e, quando se  bagnea anca ai mèrcori, l`éra parché  se gavea cata fora la morosa! Eco zera próprio cossi compare e, che contantessa che zera quando dopo del bagno se vestia la mèio giacheta, i cavei lustri, carghi de brilantina  e la scarsela piena de dolci, par i fradeleti dela tosa cavarse fora dei piè e, dopo ben montà a caval, o de bissicleta se andea in serca dela morosa, l`éra pròpio un momento màgico e, solche in starghe darente dela tosa, de ciapar ntela so man se sentia na granda emossion, nò compagno de di`ancoi, che prima i ciucia el miel e dopo i se lamenta che le ave le ze cative. No le mia vero?  Si, Si, compare e, ghe ricorde che a l`é tose ghe tochea far el bagno ntela càmera dei leti ,  rento de una candina de aqua freda mescolada co la  àqua calda de una sialera e, quele che gavea el moroso fea el bagno due o tre volte a la stimana.  Magari zera anca bruto de bagnarse ntei giorni fredi del inverno, soratuto l`éra pròpio na fadiga co`i pi vècii parche, solche  quando  la spusa zera forte i andea al rieto  co la aqua fin ntei denócii e tante volte sensa cavar via le sirole é, i passea el saon par sora e, dopo i se sechea  soto al sol, i fea cossì parvia che i gavea paura de malarse, de ciapar na palmonite e morir.

     Anca par far  í bisogni del corpo zera pròpio difarente sti ani indrio, parché se andea in torno a capoere o ntel bosco dadrio de na pianta, soto de la so ombria, sentindo el odor dei fiori silvestri e scoltando el canto dei oseleti.  Dopo se ga fato una casetina, la ‘patente’, postata  cinquenta metri a lontan dela casa, ndove sempre gavea disponìbile na sbranca de bótoli,  par netar el cul, ma quando  vignea í dolori de pansa, alora si  tochea de corer sgoelti par no broar mia le budande, in quei momenti parea fin che se metea una eternità par rivar a la casetina e, par far qualche pissadina a mesa note se gavea el orinol, sempre postà de soto al leto.

   Ma si compare, zera pròpio cossì,  con semplisità e sensa lusso che se vivea  sti ani indrio, magari se stea anca contenti, parché no se cognossea mia el conforto de adesso  e, se anca la nostra casa la zera  pròpio scarsa de conforto,  rispeto se gavea in abondansa, parché el sguardo iremovìbile dei òcii del pupà travessea nostra ànima de na banda a l`altra e, adesso compare Santin  basta de ciacolar e bevemo  nantro bicier de vin.

Ademar Lizot.

Varda el vìdio che gavemo fato con la stòria:

 

Nenhum comentário:

Postar um comentário

Gostou?Comente aqui e se possível inscreva-se.