Vose desmentegade - Jaciano Eccher

  

 Sta matina, intanto bevea el me chimarrão, scoltea ben darente ala me finestra una colomba selvàdega, che ntel Brasil i ghe dize Pomba Carijó,ma sto bel canto me ga svelià un per de ricordi che i zera querti cola pólvere dei ani.

    Me go ricordà che là i ntei ani 93, ntei primi ani de scola che go fato, mi, me cusina e due visigne, se ndea a pie studiar. Par la strada, se passea par un trodo in meso ala campagna e dopo in meso a un frutaro con tanti fruti, come naranse, cachi, abacati, e anca semense come castagne e nose. Questo frutaro el zera del me zio nono Santo Ecker, , romai che lo go mensonà, me ricordo come se fusse un ritrato postà rento ntei mei sarvei, el zera sempre ntel stesso posto, sentà ntela finestra col brasso fora, sprosiando el orològio Orient ntela man sanca e cola drita el tegnea la cuia de chimarrão; par mi, che ero un tosatel, el so viso el trasmitea tristessa e malinconia, zera fàcile véderlo par la finestra, parché el zera un omo grando, con circa. de un metro e otanta de altessa.

    La casa, una costrussion tìpica dei dissendenti de imigranti italiani de quel tempo, la gavea un fosso de àqua in cantina, a pochi metri ghera el capanon, una stala, el porsil e la patente. Ma quel che la colomba de sta matina la me ga fato ricordar, ze stà un canto de un osel che fin incoi non sò mia dir la spèssie. In nessun altro posto de sto mondo, go scoltà un canto cossì, penso che podaria esser un tipo de colomba, o un anaroto selvàdego, de quei che i vive ntei pantani. Non posso mia spiegar, ma par mi el zera un canto triste, che el fea sotofondo ala figura del me zio Santo in quela finestra.

    Compagno a questo posto, tante dele case dei nostri noni, incoi le ze solche rovine de una stòria piena de vita. In altre situassion, gnanca rovine no ghe ze. Ntel so posto, piantassion e boschi i ga sepolio par sempre un toco de tera ndove le fameie le se ga svilupade. I fioi i se ga cambiadi de posto e i pori noni i ze ndati ntel paradiso.

Revision: Loremi Loregian Penkal e Juvenal dal Castel.