Ricordi del nono Bertílio - Por Ademar Lizot

 Tute Le olte che se andea ntea casa de me sòssero, El nono Bertilio, zera um  piasere scoltarlo,  l`éra  un cristian de amabilità e simplissità e quando  discorea de Le stórie de ani vanti, Le parole ghe vignea del cuore, parche quei zera í meio ani de la so vita, quando ín so zuventù e anca dopo maridarse  el laorea ntea colônia, el zera un contadin compagno dei altri coloni che gà fato del laoro e dea fameia el sentido de  so vita.  Me piasea sentirlo discorer de come che l`era la vita in quei ani, che í fea tuto co la forsa dei brassi e che el laoro, el rispeto e la cristianità, zera í fondamenti de tuti e í laorea ntea  tera par la sustentassion de la fameia.

Í ricordi che gavemo dei nostri antenati, Le parole e insegnamenti, `l  ze par sempre in nostra testa e ànima. Questo che scrivo adesso, me gà parla el nono Bertilio Soster e nó go mai desmentegà.                                                                    
             El  me gà conta de come che zera el so laoro, el gà dito che – “ La iornada la zera longa, se stea a laorar dea matina fin a sera,  fermarse sol par la colassion , par disnar o par far el merendin. Prima se ribaltava el mato, dopo el fogo netava la  tera e la prima piantaion  zera de mílio, che l` éra la base de tuto, co´l  mílio se fea la polenta e soratuto par  ingordar í  porchi,  che  zera l`única maniera de ciapar qualche soldo de bona mesura. Dopo in te`l  posto del mílio  í semenava el formento, cossita la polenta e el pan, í zera sicuri  sú par  la  tola e co la carniassion dei porchi, se gávea  la carne, bagna e salami.” Par noantri taliani, nó bisogna piu niente. Nó ze mia vero?
          -“ Quando í porchi zera prunti, bisignava portali al frigorifico, distante diese o quindese quilometre e tante olte par no farli sofrir co quela de carga e descarga,  se menava la trupa, come se para í boini.  Se stea  atenti se el giorno s-ciarea co na promessa de bon tempo, alora se menava la trupa de porchi e questo zera próprio piú na festa che un laoro. Vanti í porchi stea meso giorno e una note sensa magnar, parche cossi í obedisse meio la iornada. De Le olte se menea darente cento porchi, tutavia anca de altri paroni.”                                                                                  
          - “Davanti andea uno con  una quarta de mílio in schena e el caminea trando zo  grani  e chele pòvere  bèstie con fame,  í obedisse meio durante la caminada,  í ghe andava drio sensa serimonie. Dadrio vegnea  la careta, par via de che se qualche bèstia se stufesse, o se fesse  dal mal,  se lo cargava e  lo menava insieme, cossi tuto andea polito.  Rivadi al frigorifico, í porchi í zera pesai e dopo í zera mistura a tanti altri de altri contadini e dopo í  spetea el so destin.”
           El nono Bertílio, el ga imparà leder, scriver e el ga fato tuta la Scola primària e quando el zera dóveno, con questa cognossensa, el ga fato el maestro de altri scolari. Ma dopo no´l  gà piú studià,  parche in chei ani, scola e maestri zera scarsi e anca í genitori, in chei ani, í catea che í brassi dei fioi í zera depi importante ntea colônia, che la testa in Scola.  Tutavia  ze  anca un pecà che una persona cossi nó gà buto la oportunità de studiar parche l`éra un cristian de inteligensa e co na granda fassilità co la ritimética, el fea so càlcoli  tuti de testa e sol de vardar í porchi,  el fea la avaliasion del peso e anca quanti soldi de ricéver. Nessuno lo ciavea.
           Al giorno drio, bonora, co í so schei in scarsela, prodoto de so laoro,  tornava casa, vanti  andea ntea  bodega provéder qualche provision e soratuto í dolci, carameli, par í bambini, parche quando rivea casa co í dolci, zera una granda felissità.
         Quando el zera casa co so fameia, nó   l`era compagno de la maioransa dei altri coloni, che in quei ani, í fea Le femene far tuti í laori dea casa dopo de iutarli ntea colonia, l`éra un Omo própio avanti dei altri, parche el gávea la cossiensa e dignità, de che bisignava aiutar  so sposa co í laori...,  far de magnar, pareciar la polenta, far  í bigoli e  tante altre cose.  De matina bonora zera lu che saltea su prima de tuti e dopo  scaldea el chuchio dei bambini, in quei ani no se gávea fogon a gás, alora el fea el fogo co una scartosa de milio e fin che la se bruzea el late zera caldo e nel punto giusto.
        Ghe piase zugar el baraio, el quatrilio, tré-sete...,  questo insieme co el sìgaro de scartossa de mílio, zera so divertimento.  El  fumo de so sìgaro zera lu che  piantea e dopo lo pareciava,con so man e so siensa. Quando el fea sto sìgaro zera fin bel vederlo, el gávea un ritual, un serimonial, gávea la maniera de farlo, con passénsia,  tegnendo sto tocheto de fumo in man, lo taiava próprio su la mesura, dopo lo spicassea e sora la man lo sfreguea ben par èsseguer ben spartío. Cosí  zera piú fàssile par  impissarlo.
        Cossí el nono Bertílio, un pochetin de so laoro, de so vita quando el zera colono.  Dopo pensandoghe sora go capi, che in quei ani, la simplissità de Le persone, insieme  co la naturaleza,  fea la vita bela, má con tanto lavoro e tantoquanto de dificultá, che noantri no semo boni de maginarse.  El  esémpio de vita che gavemo eredità de persone compagno del nono Bertílio,  la  simplissità, la devossion al laoro, la speransa e la fede en Dio e so bontà, ze í fondamenti  che gavemo de mantégner par noantri e nostri fioi e nepotini.

Ademar Rocco Lizott.