La ombria dela veciaia - Ademar Lizot

Clica qua par scaricar el àudio.

Par ascoltar la stòria, clica soto:

Imagem gerada por IA - Jaciano Eccher

La ombria dela veciaia

Autor: Ademar Lizot

Revision del Talian: Juvenal Dal castel e Loremi Loregian-Penkal





Che el mondo el ga cambià, nissuni i pol dir de nò. Vardé la triste realtà che la ghe ga tocada ala maioransa dei vècii de adesso, che no i ga pi gnanca el dirito de morir ntel suo leto, dentro dela so casa.

Sti ani, invesse, i vècii i passea la so veciaia sensa la angùstia de adesso, parché i savea che la vita in fameia no la se finia mai. I savea che un dei so fioi, squasi sempre la fiola pi zóvena, la restea par ténderli ntela so veciaia e che, insieme ai altri fradei, i gaveva de mantegner la tera, la casa e le robe dela fameia, par che le fusse, par sempre, un punto de riferimento par tuti i so dissendenti. Questa la zera la vera tradission nte quei alontanadi tempi che, ntele fameie ghera na fila de fioi, che, al morir, i noni e i so genitori i gaveva na s-ciantina de consolassion, parché i savea che i zera partidi, querti de teneressa e afeto, e el suo esémpio de vita e, tuto quelo che i gaveva assà, el saria con tanto orgólio mantegnesto.

Ai di de ancoi, invesse, al morir un dei vècii, a quelaltro, i fioi i lo interna. Meio saria dir, i lo abandona nte un asilo, ndove el ga sol la compagnia dei laoradori del asilo, brave persone che i ghe tende ai ansiani con tanta dedicassion, tanto afeto e i se mèrita tuto el nostro rispeto. Però, squasi sempre, ne i fioi, ne i parenti pi ìntimi, no i va pi troarlo e, el resta là, pròpio butà via, come se el fusse un can sensa paron. Ntei solchi dela fàcia, se vede la stampa dela tristessa. Ntela malinconia dei so òcii, el segno dela so bruta solitùdine. Ntel suo cotidiano, el passa el fin dela so veciaia soto la ombria del avilimento. No el fà depì senò che spetar la so ora. El sà che, de là, el vien fora sol par ndar al semitero.

Fà fin pecà che, nte questo mondo, rabaltà in gambe alte, ai nostri vècii poco se pol far, parché se anca romai, adesso, squasi tuti, i ga la so pension, sicuro che ghe manca la serenità che ghe zera na volta, quando morir no zera mia na disperassion, fursi, parché i savea che i so afeti, le so radise le fea mantegner la union e la tradission dela fameia. Se nassea e se moria dentro dele vècie case e, quei che i restea qua, no i se desmenteghea mai pi de quei che i gaveva partì, par la altra banda.