Nadal e la cuna del Dio-Tatin - Poesia de Natal per Ivanir Signorini

sexta-feira, 15 de dezembro de 2017


Ndove ze el Dio-Tatin?
No lo scolto, no lo cato!
Son drio spetalo, ma no Lo vedo!
Gnanca i can sbàia par avisar che Lu ze drio rivar
Ndove zelo?
No so dirte!
Lo cerco par tuti i cantoni, ma no lo cato!
Ndove zelo?
Semo ntel tempo de spetalo!
Son stufo de spetalo e il tempo l'e fenido
Ndove zelo?
No sò dirte!
Nono! Nona! Giuteme!
Bisnono! Bisnona! Deme na man!
Imprestieme i vostri òcii!
I òcii dea fede Taliana
I òciidei nostri antenati
I òcii taliani
Se impresité saverò ndove zelo!
Lora saverò dir ai altri!
Con i òcii taliani lo vedo in so cuna!
E cosa ze sta cuna?
Ze la vita taliana, la cuna taliana
Adesso sò dirte ndove zelo!
Tea cuna taliana!
La cuna taliana ze nostra faméia!
In torno al fogon drio brustular la polenta
Tel'ària drio parlar intanto la piova sona e bala tel scortivo.
Sentai in torno la tola ligai pal el fil dea polenta.
El capel in tera intanto se beve un per de cuie de simaron
Scoltando el gal che canta in cantina
E i putei che giuga soto la ombria dea naransera
Adesso sò dirte ndove zelo!
Tea cuna taliana!
La cuna taliana ze le note taliane!
Note con i nostri vicini contenti drio far filò
Promosi par bever el brodo con formàio gratà
Cunai con un garafon de vin
Completi col giugo de brìscola, canastra o quatrìlio
Spaventai col gal che cata parché ze belche mesa note
Ze ora de ndar casa!
E la domanda?
Suito tea digo: El Dio-Tatin ze tea cuna taliana!

Preparemo la cuna al Dio-Tatin
Scoemo el scoartivo del cor
Netemo le cose sporche dea vita
Sgorlemo la pòlvera (poera) dea ràbia e dea invìdia
Pareciemo la cuna
Tea faméia, con i vicini ... in tuti i canti
Femo el nostro cor brusar cole cose bone e taliane
Giutemo un'al altro!
Parlemo talian!
El Dio-Tatin vol parlar al nostro cor
Vol parlar in Talian
Vol noantri come semo
Co'le nostre radise
Co'la nostra cultura
Compagni ai nostri noni e bisnoni
Adesso sò dirte ndove zelo!
Tea cuna taliana!
Mà ndove el Dio-Tatin noi vol portar?
Ndove ndaremo?
Questo si tuti savemo:
Tea granda cuna taliana!
Sta granda cuna ze el cielo!
Ndove ze i nostri antenati!
Ndove ze i nostri noni e bisnoni
Felice per sempre insieme al Dio-Tatin!

Nenhum comentário:

Postar um comentário

Gostou?Comente aqui e se possível inscreva-se.

Topo