El Roano e El Baio - Ademar Lizot

domingo, 25 de agosto de 2019

Spùncia soto par ascoltar la stòria:
 
                                         El Roano e el Baio
         Stiani  nt`un paeselo che se ga mai sentisto parlar, gavea  un contadin che zera paron d`una  bela giunta de boini, compradi quando i gaveva meno d`un ano d`eta,  un de color roano, co`l  pel meso ciaro insieme de màcie scure e  quelaltro de color  baio  co na mùcia de màcie ciare,  i ghe ciamea de “Roano e Baio”,   una bela giunta   quei dopereva con frequensa par tirar la careta e anca par arar la tera.  Í zera tanto pacifichi e pieni de dolcessa che quando se mostrea una panòcia  de milio o qualche toco de suca, i vigneva contenti  co`i denti a mostra e i lavri grandi pieni de bava, pronti par magnar e dopo far el laoro quei   zera tanto abituà in quel afar che quando qualchedun se pareciea   su  dela careta, i due boini,  sensa nissun ciamarli,  i andea in diression al  tiron (cabeçalho) e i stea la fermi fin che i ghe metea la stringa dela canga par i corni.    Cossì ga passà i ani e quele bèstie  ga acompagnà  la infansa dei tosatei, ntei afari dela colonia e anca par tirar la careta, par menarli ala messa ntela domènega, e nte quei momenti i  stea la, par depi d`ora, fermi  co la canga por sora del col, penso mi che gnanca àqua nò i ghe dea mea e co`l passar dei ani, quando i ga perso la forsa quei gaveva, i ze stà sustituì par nantra giunta de boini pi novi e par conseguensa i ze stati meso sbandonadi  ntel fondo del potrero, ndove se assa le bestiame par passar l`inverno al resguardo del fredo.    Alora  nte un giorno al final del outuno,  i ga incontrà el “Baio”   morto,  tuto sgionfo parvia d`un sganon d`una bissa giaralaca e el “Roano”,  insieme, molando par ària un mugito tristo,  drio sguardar quelaltro in tera, come sel fusse drio ciamarlo a pascolar insieme ntei campi o furssi par andar tirar la careta e quela lamentassion  l`éra come se fussi un testimònio che  la morte de  so amico la ze stada par lu  na cativa .   I ga proa pararlo via, però el fea trè o quatro passi e dopo ritornea  e cossì el ga resta par de pi d`giorno, sempre  pascolando darente, andea via par bever àqua e dopo ritornea,  slonghea el col par quel morto e molea un mugito malincolico, che comovea a tutiquanti.
           Dopo de quel sucedesto el vècio Roano, el zera sempre a pascolar in torno dela casa parvia   che ghe piasea star insieme dei tosatei come sel fusse un cagneto scherzando e fursi  desmentegarse de suo compagnero morto.   Cossì el outuno ga passà  e ntel inverno quela povera bèstia se ga inmagri  e l`é deventà tanto fiacoto che  pol esser che nò suportea pi  nantro inverno.  Alora el paron ga deciso de darghe de pi milio  par  ingordarlo un pochetin e dopo coparlo par nò  perder el coro  roano co màcie scure e anca qualche toco de carne, seben che la carne la pol èsser massa dura e bisogna cosinarla arquante ore par che la vegna mola.
            De sta maniera ga passà nantro inverno, dopo la primavera e ntel scominsio del veron el Roano gavea cambià el pel e anca ingrassia un pochetin.  Alora ntel mese de dicembre, un sabo al s-ciarir  del di,  ga riva ben monta nte suo caval, el  gausso che gaveva el ofìssio de carneador, el ga vignesto de capel co la ala scavensada in sù e  co`l  cortel che taia ben par far compir el destin de quela povera bèstia, el paron lo gavea ciamà,  sensa dir gnente a nissuni.                                                                                                                                                                                                  Hò roano, Hò roano”, c`un toco de suca in man, í ga ciamà el pòvero, che ga vignesto contento co`i lavri grandi pieni de bava e Intanto quel magnea quel toco de suca i ghe  ga liga  co na soga a`n  pal, darente dela careta che tante volte el ga tirà.  Alora ntel momento quel carneador passea  el cortel ntela sàira  i tosatei  i  se ga  disperà  e  suplicà a suo pupà de nò  far mea el pecà de copar na bèstia quei volea pròpio ben, quel zera tanto pacìfico e  stimà come sel fusse dela fameia.  El paron ghe ga dito quel destin dele bèstie  zera el cortel.   Dopo de queste parole de chi trata le bèstie con  crudeltà,  el ga fato un segno al carneador che d`un colpo el ga impiantà el cortel fin el mànego ntel cuor del Roano,  che ferì de morte, co`l sàngue drio corer par el peto, meso oscilante, ancora  el ga dato trè o quatro  passi e se ga incostà de na banda del tiron dela careta,  dopo el ga metesto i corni ntel posto dela canga e el ga resta la par un s-ciantin fermo, come se fusse drio spetar  quanchedun che ghe metea  la stríga dela canga ntei  corni par  tirar par la ùltima volta la careta, dopo se ga indenocià e casca par tera ntel  l`ùltimo sospiro .
      Alora nte quel s-ciantin  i ga sentisto un mugito tristo de quelaltre  bèstie nel potrero e  intanto che un cagneto lecheva  el sangue par tera, un bambin ga scominsia a pianzer, con lagrime che ghe vigneva del profondo de so ànima, parvia che con so òcii de inossente, el ga visto che de soto del pel del “Roano”   gavea una ànima e fursi pi lìmpida e pura che la ànima dei omeni, che tanti gnanca ànima nòi ga.

Ademar Lizot.

Nenhum comentário:

Postar um comentário

Gostou?Comente aqui e se possível inscreva-se.

Topo