Formato de`n Stival (Per Ademar Lizot)
Tanto
bele, tanto presiosi zera l`stòriete che`i noni contea. Ricordo che gavea un
piaser stragrando quando el noneto parlea sora el suo paese de nassità, quel
che gà el formato de`n stival, la bela Itàlia, con emossion el savea descriver co`i i pì mìnimi detàlii la so stòria, i
monumenti, scolture e, construssione dela antighità, compagno el imponente Colosseo,
con so archibancade milenare incarminade co`l sangue dei màrtiri Cristiane strassinadi soto l` bèstie ferosse, quando ga
scominsia el Cristianèsimo de Nostro Signor Gesù Cristo. El Castel Sant`Angelo,
el Panteon e, el forùn Romano capo laori dela engegnaria dela antighità, quando
Roma zera la cità pi importante del mondo. Quando el parlea sora el Vaticano
l`maestosa ciesa de San Piero, el descrivea co la giusta emossion, l`belessa,
l`formosura de quela imponente costrussion, piena de capo-laori, soratuto quel de Michèlangelo
Buonarroti, la scultura più bela e notèvole de tuti tempi, ‘La Pietà’, che
ritrata la Madonina quando La riceve ntei bràssi el Nostro Signoreto Gesù, pena
sbassà dela crose.
Traverso de so parole el pintea
un ritrato dela bela region dela Toscana, alora parea fin che`l gavea el poder
de farme volar, par sora de quel paisàgio spetacolar, ndove a
tanti ani indrio ga pestà Leonardo Da Vìnci, el gènio dela umanità e, el magnìfico Dante Aleghieri, el poeta dela
latinità. Quando scoltea dela serenìssima Venesia, la più bela cità del mondo,
go imparà quel idioma veneto le parlá par de pi de mila ani. Anca d`Nàpoli el contea e me transportea ai piè del monte Vesùvio e dopo
a la antighissima Pompèia par caminar par sora dele so stradete milenare, come
se fusse drio leder un libro che conta sora el eterno dela vita.
Quando se domandea sora el suo paeselo de nassità, ai piè dele Dolomite di Cimonega, Provìnsia de Bellun, ndove se trova na natura de insólita richesa co na flora e fauna incontaminatà, alora nte quel s-ciantin el moiea l`gola co na sboconadeta de vin, serea i òcii e cavea el capel dela testa in rispeto ai soi antenati e, de sta manera la so vose meso rauca, meso grave, saltea fora dela gola co la giusta emossion che fea la imaginassion oltrapassar i limiti del imaginàbile.
Gràssie infinite cari noni, che traversso de
vostre stòriete go vivesto tuto el incantamento quei bambini i ga ntela
infansa, co vostre parole de sapiensa e dolcessa go alsa sù el mio sogno de visitar la bela Itália e, quel
sogno ga daventà un desidèrio tanto
persistente, tanto elaborà, quel ga daventà un ogetivo dela mia vita, dopo de`n
tempo realisà.
Ademar Lizot.
