I ÒCII DEL NONO - Ademar Lizot

 Clica qua par scaricar el àudio.

Par ascoltar la stòria, clica soto:

I ÒCII DEL NONO

Autor: Ademar Lizot

Revision: Juvenal Dal Castel e Loremi Loregian-Penkal

Imagem gerada por Inteligência Artificial - Immagine generata dall'intelligenza artificiale

I òcii del me nono i ze vignesti del distante Véneto, ndove, ntela infànsia, i ga visto i fioreti su par la riva del monte Grappa.

Dopo, ntel porto de Genova, i so òcii de tosatel, par la prima volta, i ga visto la belessa del mar e, durante el viàgio sensa ritorno, i se ga spaventai col furor del cativo oceano. Al rivar ntel novo mondo, davanti dela stragranda foresta, coi simioti a saltar de una pianta al`altra, traverso dei so òcii, fursi, el ga sentio el spìrito de aventura, fursi, del scognossuo, la paura. Coi so òcii, colmi de incantamento, el ga remirà el pin, la pi bela pianta brasiliana, che, fora de esser maestosa, la fea fin spavento, par la so imponensa dela ramada e la grossessa dela bora, squasi del diàmetro de un caval. Piantona che la fea parte dela granda catedral dela natura, bela e selvàdega.

Ntel transcorso dela vita, i so òcii, con tanto gusto, i ga remirà i fiori de pètale veludade, che le càmbia del verdo al gialdo, del pórpora al viola, del rosso color de sàngue, al bianco dela pace, dei campi e boschi dela Provìnsia de San Piero. E, se anca, no el ga pi visto i pi bei e profumosi fiori del so paesel de nàssita, ntela Provìnsia de Belluno, un vero paradiso Europeo, se pol dir che, ancora cossì, l´è stà pròpio fortunà, parché i so òcii, celesti e boni, i ga scampà via de veder tante brute robe, che le sucedea ntel vècio mondo, sacrificà soto la brutalità de due guere mondiai, soratuto la seconda, sicuramente le pi crudele che el mondo el ga cognossesto, che tanta morte, tanto òdio e tanto sàngue le ga spandesto.

L`è stà nte un giorno del autuno del 65, che i so òcii, che de tanto ciari, i parea fin due finestrine verte dela so ànima, òcii che, se anca i vardea con sincerità e amabilità, anca i savea distingher el rango, quando, sentà e el orbo, quando a riposar, par sempre i se ga serai. Però, traverso dei so dissendenti, i so òcii i ze ancora qua e, de tuti i colori, ciari come un giorno de primavera, negri e profondi come la note pi scura e castagni, che i càmbia del gialdo al asul scuro e, anca quei, stesso dei mei, che, se anca sensa gnanca una belessa spessial, no i me ga mai negà una vardada, che, de zóveni, i gavea un ciaro dela tempesta e, adesso, vècii de teneressa.