Pagine

Clique para entrar

RÁDIO AMICI DEL TALIAN NO AR

terça-feira, 9 de julho de 2019

Testa de Galina - Roberto Arroque

De una tribo che non se sà qual che la sarà stata, nei ani quaranta ghe ze capità in
Serafina un ìndio, che'l se gà dato de cognosser par “Alfredinho”, o “Alfredin”, sol cossita.
No'l saveva gnanca sel gaveva cognome, e documenti nol ghen’aveva mia.

El se gà costumà gran ben al sistema dei taliani de la “Ùndeze” --come che tuti i
ciamava el paese de Serafina quel tempo là--. Ma el gà mantegnesto sempre arcoanti
costumi che a la gente del posto i pareva ridìcoli --par via de che, la sivilisassion dei
bianchi, lu no la gà mai capida del tuto.
Alfredin el dormiva in quà o in là, ntele case dei moradori che ghe dava posto. Par
magnar, stesso. E, in paga, el fea laori domèstichi, come spacar legna.

Una dele maniere de esser dela so gente, i “bùlgheri”, la zera quela de portar
sempre drio tuti i so pertensi –gran pochi, magari.
Quel sistema, però, el se gà mostrà nessessàrio --parvia dei tosatèi sempre pronti
par far malani, a ponto de Alfredin ndar via al tempo de istà vestìo con due giachete. E el se
despiegava:
“ –Se patisse un poco de caldo, con due giachete. Ma l’è tanto mèio de che assarle
in volta par i tosatèi impienirghe su le màneghe de gropi...”
El gà portà avanti la so vita sensa pensieri par tanti ani, defendendose con sassade
nele ciare volte che i ghe fea qualche dispeto più vil. E sol par veder che distante e con che
mira che'l trea i sassi!
Dopo che, par vècio, l’è stà recoliesto a un asilo de Porto Alegre, ghe ze sucedesto
un fenòmeno nele feste che se fea ntela Ùndeze: le galine le gà scominsià a ver una mùcia
de teste! O, almanco, dopo de fenidi i pranzi de le feste, le done in cosina le se inacorzeva
che vansava tante teste de galina...
Tuto gà sorgisto par via del fato de che, pena rivà a la Ùndeze, vanti che i lo
cognossesse polito, Alfredin no'l zera mia tratà pròpio de la meio maniera...
Un giorno, quando che i fea i prepari par un disnar importante ntel salon de la ciesa, lu el ghe ze
capità domandando qualche cosa par magnar. Una dele done che laorava in cosina,
vardando sto bulghereto strànio, la ghe gà mostrà una mastela piena de teste de galine lesse,
che le ghe sarìa trate ai can.
Alfredin el ghen’à tastà una e magnada con coriosità. La seconda, par confirmassion
del gusto. La tersa lu la gà parada zo col piasèr del prinsìpio de una nova passion!
De là avanti el ze capità in tute le feste par domandar quela che la se gà tornada
sempre la so parte del pranzo: le teste de le galine!
Anca, tempi dopo, quando che'l se gaveva tornà una persona de tuta confiansa, e i
ghe oferesseva de le parte pi bone, el respondeva con parole che le ze deventade famose:
“ --Vui teste de galina!”
E intanto che i altri i vardava con serto repugno, lu, pacìfico, le gustava --savendo
de non aver mia concorenti par spartir el so magnar predileto. Tocava che la festa la fusse
pròpio granda par vansarghe qualche testa de galina ai can –parchè lora la pansa de
Alfredin no la zera mia granda bastansa--. Sinò el se la godeva a magnarle fin che la
mastela de le teste la zera voda...
El ze stato così tanti ani magnando le teste de quasi tute le galine che i copava par le
feste che, ntel primo pranzo festivo dopo che'l ze ndà via, le coghe le se gà sorprese de
veder quante teste de galina che ghe zera quando le gà fenìo i laòri in cozina dopo de servir
el magnar --come se de repente le galine le fusse deventade tuti dragoneti de sete teste...

Stòria de Roberto Arroque!

Nenhum comentário:

Postar um comentário

Gostou?Comente aqui e se possível inscreva-se.

txt

google.com, pub-2838464224155337, DIRECT, f08c47fec0942fa0