La vècia vendedora de ovi la se presentava ntele case con una sestela granda che la
fea fin fadiga portarla. E quando che la mostrava cosa che ghe zera dentro, se vedeva
colmo de bei ovi grandi, de quei bianchi mescoladi con quei color rosa.
La vecieta la negossiava el prèssio: sete fiorini a la dósina. Un valor bon par la grossessa
dei ovi. Ma, quei che acetava el prèssio, drio man i vedeva la vendedora ciapar i ovi grossi
e meterli de una banda. E dopo la sfrugnava soto par tirar su i ovi un bel poco pi picoleti, che
i zera quei che ela la ghe li intregava ao comprador.
Dopo la tornava a meter par sora i ovi bei che gaveva atraisto el freghesi par la compra.
“- Questi quà i ze sol par far presensa! No i ze mia par vender...” – La spiegava sta
dona. “--Par vender i ze sol quei de soto...”
La fea sempre così. E ‘l strànio zera che no se gà mai gnanca sentisto dir che
qualcheduni ghe gavesse dito su a ela par ver fato el prèssio de ovoni e dopo ver vendesto i
oveti. Penso che sarà stà parché la zera pròpio una vecieta, una ansiana. E a la gente la ghe
fea pecà. Ma a ela nò che no ghe fea pecà nissuni... La seghitava sempre con la so tàtica de
far el prèssio par la vista dei ovi grandi, quei de sora, e dopo pararghe avanti al comprador
quei pìcoli de soto.
Magari, un giorno, la Pierotta, dopo de ver comprà una dósina de ovi e mandà la so
fioleta che la li portasse dentro --e la vecieta, lora, no la podarìa più torli indrio-- la ghe gà
dito:
“- No gò mia più soldi. Gò solche una nota de sìnque fiorini. Ma questa la basta para
pagar una dùzia. Parché la Genoefa la vende de quei picoleti come i vostri a sìncue! E ela la
vende a sete fiorini sol quei grossi, compagni de quei che vu metì par sora par far presensa.
Lora no che no ve pago mia i sete fiorini, parché sìnque i basta!”
E, Quando che la Pierotta la gà verto la so cartera, quela furba de quela vècia la se gà
inacorta che la gaveva rento due note de soldi: una de diese fiorini par sora e nantra de
sìnque par soto quela che la Pierotta la la gà tirada fora e la ghe la abanava devanti la
vècia.
Pitosto de no vender mia, la vendedora la ghen acetaria anca i sìnqoe. Ma prima la gà
proà mostrarse cativa par esser paga manco del prèssio che la voleva.
“—È ben...” la gà sclamà lora la vecieta. “Come zelo che te disi che no te ghè mia
pi soldi, solche una carta de sìnque fiorini... E quela li de diese, lora, zela che?”
“La ze sol par far presensa...”
Tanti i vol dir che de là avanti la vècia la se gà curada del vìssio de figurar co'i ovi
grandi, e la gà tacà meterli tuti compagni ntel sestel. Ma altri i dise che la se gà curada
par nantro fato, che ze stà parvia de quela volta che Tìti Migliavacca... Ben, assè che ve la
conte come cha la ze stata.
I dise che Tìti el gà mandà far un sestel giusto compagno de quel de la vècia. E in un
dei so viàgii in volta el gà comprà una mùcia de ovi de avestrùs. Lu li gà metesti in tel
sestel e sconti con la ombrela. El gà spetà che la vècia la se voltasse par veder qualche cosa
--che la zera romai pegra-- e el gà trucà sgoelto de sestel, sensa che ela la se inacorzesse. El
gà fato finta continuar la so strada e ndato sconder el sestel original de la vendedora, e dopo
el ze tornà in drio.
Quando che la vècia la se gà voltada --ela che gnanca no la saveva che esistiva bèstie
che fea ovi grossi così --la gà visto quei bruti ovoni ntel so sestel! E scoltà Titi che'l ghe
diseva:
“Che bela presensa che i fà quei ovi li! Me li vendèo a quanto?”
La vècia la gà catà su el sestel – pensando che'l zera el suo-- e la se la gà tolta. La gà dito
che prima de tuto tocava ndar casa pensar-ghe sora come che i ovi i gaveva fato par crèsser.
E anca se no la ghe gà mai palesà a nissuni se la se gaveva inacorta del truco del sestel
o de cosa che i voleva dir sti ovi cressenti, de là avanti si che la gà livelà la misura dei ovi,
adesso sempre tuti compagni, del primo de sora fin quel pi in fondo ‘l sestel...
