La Prima Comunion - Ademar Lizot

Struca soto par ascoltar.

 

 

                                 

             Prima Comunion (per Ademar Lizot)

         Questo l`é un ricordo che go par sempre intaià ntel fondo dela mia memòria!

   Nte`n domènega primaveril dei ani sessanta go fato l`prima comunion e, se anca el tempo  ga viaià ntele ale del vent,  nò go  mai desmentegà quela Santa serimónia rento de una cieseta de stilo romano, co`l sofito pintà co la imàgine dei Santi Apòstoli e, altar consagrà a la Madonina de Lourdes. De na banda la gavea una tore che sustegnea l`campana. Nte quela domènega la gavea l`é banchete tute ornàde de fiori e,  par ària sonea l`campana ciamando i cristiani. Ntel momento dela Santa Mesa, intanto che la comunità cantea na bela cancion, gavemo intrà ntela ciesa, un drio altro, i tosatei de na banda de fatiotina, co`l rosário e candela in man  e, l`é tosete de quel altra  con un vel de seda bianca ntela testa e, l`é man unite in preguiera e, cossì in fila se gavemo tirà davanti del sacro altar e, quando zera tuto parecià par scominsiar la celebrassion, se ga presentà Don Egìdio, el prete dela comunità, paramentà a rigor, de alba bianca, stola rossa e piaseta dorada, tuta carga de símboli litùrgiche, insieme el gavea i coroini, anca quei ben paramentàdi, co`l insenso e el turìbolo dela fumanina bianca e, dopo del ‘dominun uobiscum e del orate frates’, del púlpito el ga fato l`prèdica e, co parole carghe de sapiensa  el ga dito che la Santa Eucaristia l`é el pi belo sìmbolismo intra la fame del corpo e del spìrito sàssia ntela comunion e, la representea  un rito de passàgio, un vero marco emancipatòrio dela vita, par andar in serca dele trè più bele virtù de`n  cristian;  la fede in Dio e so bontà sensa fin, l`speransa de`n mondo mèio e l`generossità, la regina de tute l`é virtù.  Ntel momento dela consagrassion, intanto quel prete insensea la Santa òstia e, el sacristan fea sonar l´campanela, alora indenocià, co la testa sbassada, man postade par sora dei balaustri de legno, go ricevesto par la prima volta la Sacra Comunion e, nte quel s-ciantin nostro Signor Gesù Cristo se ga fato presente in m`ànima e, in tuto el mondo nò gavea mia un tosatel pi felisse che mi.  Dopo go ritornà a la bancheta par dir la preguiera che savea de memòria. 

   Nte quela domènega indesmentegàbili go guadagnà na atenssio special de tutiquanti e, ntel pranzo del mesdi la mama ga parecià un vero banchete e, el pupà ga liberà el so mèio vin par far el sagù.

   E cossì finisso questo relato, parchè el tempo dela gioventù no`l ritorna mai più!

 

Ademar Lizot.                                         

Giorni Grissi del Inverno - Ademar Lizot

Ascolta la stòria strucando soto:

 

 

                                   I Giorni Grissi del Inverno (par Ademar Lizot)

                    

          Scominsia nantro inverno i so giorni grissi i me fà ricordar de sti ani indrio, de quando zera tosatel, ancora tacà sù l`braghe de mio pupà, un tempo in che el calor dela fradelansa scaldea nostra ànima, parchè se vivea in completa simplicità e rispeto. Alora ricordo dela mia noneta che ntele note frede,  intanto che la fea el so scalda piè, la contea stòriete de streghe, che spaurea tutiquanti. Ricordo anca del noneto, quel savea del tempo i segreti e, intanto quel bevea cafè co graspa par scaldarse, el dissea che se de note el vent fermar, na bela matina de brina gavea de s-ciarar. Ricordo dela contantessa che gavea de spacar l`brina co`i piè scalsii, par dopo in torno del fogolaro scaldarse.

         Però quel tempo indesmentegàbile nò ritorna mai più e, adesso i giorni grissi del inverno i me deprime, soratuto quando scolto el mormòlio del vent che sùfia ingiassando l`rècie, l`é un sussurro mastegà de malinconia, come sel fusse el gèmito lamentoso dele ànime de tanti porigrami che patisse, scarsi de robe par difenderse del fredo inclemente e, che gnanca un canton suo par riposar nò i ga mia. Tutavia posso dir sensa paùra de sbàlio che di d`ancoi el fredo pi doloroso l`é quel intaià rento dela ànima dei omeni, el fredo del orgòlio, dela arogansa, dele parole de rudessa, el fredo de òcii rabiosi, sempre pronti par agredir.

         Magari scominsia nantro inverno, co so giorni, meso brina, meso piovesina e, quando l`luna  scominsia a sbassarse par sora de tera e mar, l`é el momento de ringràssiar al Signor-Dio par nantro giorno e dopo verder na botìlia de vin, par liberar l`anima dela ua, che con so profumo gradèvole  portà insieme na`arieta de piaser e, ntela prima sboconada de quel vin bonasso, me vien el sentimento che la mèio richessa l`é volerse ben, parchè la felicità l`é fata de de cose sìmplisse come na brustolada de pignoni ntela ciapa del fogon e, admirar el firmamento colmà de stele, insieme dela luna con so splendor d`argento.

Ademar Lizot.

In Mèrica non son mai stato - Testo e vìdio - Gruppo Belunesi

Clique aqui para baixar o áudio dessa música.

Para ver letra e tradução de outras músicas, clique aqui.

Confira o vídeo:

 Testo in talian:

In Mérica no son mai stato Ma in Mérica voglio morire Oi bella vusto venire In Mérica insieme com me Oi bella vusto venire In Mérica insieme com me Mérica Mérica Mérica Cosa sara la sta Mérica Mérica Mérica Mérica Le un bel giardino di fior. No no mi no vado in Mérica La Mérica le troppo lontano Se fuse li a Milano Io vegnaria com te Se fuse li a Milano Io vegnaria com te In Mérica c’e tanta terra In Mérica c’e tanti lavori La se faremo siori Come i siori de Milan La se faremo siori Come i siori de Milan Quando siremo siori Faremo una grande festa Ghe baciaremo la testa Ai siori de Milan Ghe baciaremo la testa Ai siori de Milan Ghe taiaremo la testa Ai caponi e le galine Se tu no vuoi venire Soleto io andro Se tu no vuoi venire Soleto io andro.